Wikipedia:دؤجئه وانويس/۲۰۱۹/۰۴
حسن ضیاظریفی، یکته چیریک بو که بیژن جزنی و عباس سورکی همره یکته کؤمؤنیستی جرگه چاگوده بؤن و ای جرگه، چن سال بعد، یکته جرگه دیگرˇ همره متحد ببؤن و سازمان چریک‌های فدایی خلق ایران بنأ ببؤ کی یکته پیلˇ چیریکی سازمان بو. ضیاظریفی سال ۱۵۱۳ (1318 هجری شمسی)، لاجؤنˇ مئن به دونیا بمأ و سیاسی حؤقوقˇ مئن لیسانس هیته. چون حسن ضیاظریفی خانواده (اینˇ برأرؤن) سیاستˇ مئن دبؤن، اونأ نی وختی زأک بو، توده حزبˇ روزنامهٰ‌نه خؤند و گاگلف فورت. 1529 زمسسؤن، وختی که گیلانˇ مئن یکته توده‌یی خال دستگیر بنن، حسن ضیاظریفی نی به عنوان کسی که باخبر بو بازداشت بنه و چار تا پنج روز رشتˇ دژبانˇ زندانˇ مئن زندانی بو.
سال 1534، وختی که مللی جبهه خو سیاسی فعالیتؤنه سرأیته، حسن ضیاظریفی نی بوشؤ ای جبهه مئن و اوشؤنˇ جلسهٰ‌نˇ مئن کی جبهه رهبرؤنˇ خؤنهٰ‌نˇ مئن (مثلˇ دؤکتؤر سنجابی و دؤکتؤر صدیقی) تشکیل بنأ بو شرکت گود و اوشون‌ئبه کار گود. مثلن اعلامیه پخش گود یا تجمعؤنˇ مئن شرکت گود یا دانشگا تعطیلی مئن همکاری گود. 1534 زمسسؤن، انتخاباتی فعالیتؤنˇ وأسی بازداشت ببؤ و دو ماه قزل قلعه زندانˇ مئن دبو و بازون رها ببؤ.
1536 شریر ما 17، وختی کی چتربازؤن دانشگاهˇ مئن فوروز بمأ بؤن، اینˇ کلله، سرنیزه همره به شدت زخمی ببؤ و 1536 دیا ما 28، حؤکؤمت نظامی مئن دستگیر ببؤ و پنج ما قؤلدؤنئکˇ مئن دبو و دو ماه آزادی پسی بشؤ اجباری و 18 ماه ارتشˇ مئن ایسأ بو و بازون، یکته شرکتˇ مئن (بهشهرˇ شرکت) مشغول به کار ببؤ.
سال 1541 پئیز، ساواک یکته کؤمؤنیستی انقلابی سازمانه کی به پارتیزانی جنگ اعتقاد داشت کشف کؤنه و دوتته اونˇ رهبرؤنه (بیژن جزنی و عباس سورکی) گینه. حسن ضیاظریفی نی هی جرگه مئن عضو بو و او دو نفرˇ گیتنˇ پسی، جرگه افرادˇ هدایت و رهبری‌یه به عهده گینه، امما هو سال، امیر ما 11، حسن ضیاظریفی‌م دستگیر بنه و نظامی دادگاهˇ مئن به 10 سال حبس محکوم بنه...دۊمباله