خۊزستان اۊستان، ايته جه ايران ٚ اۊستان ايسه گه ايران ٚ خۊرخۊسي نسا مئن نهأ ؤ اۊن ٚ نسا فارس ٚ خليج ٚ ورجه قرار بيگيته دره. خۊزستان اۊستان ٚ پيلئکي ۶۴,۰۵۷ کيلۊمتر مۊربع ایسه ؤ ۴,۷۱۰,۵۰۹ نفر جمعيت ٚ أمرأ (۱۳۹۵ خ.)، ايران ٚ پنجؤمي پۊرجمعيت ٚ اۊستان ایسه. ۱۳۰۳ سال ٚ مئن، خۊزستان ٚ اۊستان ٚ مرکز شۊشتر ٚ جه أهواز-أ مۊنتقل بؤبؤست ؤ تا هأسأ، أهواز أ اۊستان ٚ مرکز ؤ پيله شأر ایسه. خۊزستان ٚ اۊستان، فارس ٚ خليج ؤ أروندرۊد ٚ ورجه نهأ. أ اۊستان ايته راهبردي ؤ ترانزيتي جۊغرافي جيگا مئن نهأ. خۊزستان، تئران ٚ اۊستان ٚ پسي، ايران ٚ اۊستانان مئن ويشترين ناخالص ٚ توليد-أ دأره. تاريخي نظر ٚ جه، خۊزستان ايته جه ايران ٚ فلات ٚ قديميترين مسکۊني منطقهئن ایسه گه انسان ٚ زيوش اۊن ٚ مئن ۲,٧٠٠ سال مسیح ٚ ميلاد ٚ قبل ؤ عيلام تمدؤن ٚ شکل گيري ميلاد ٚ قبل ٚ سوؤمي هيزاره-أ واگرده. خۊزستان، کلسيا جه لؤرستان ٚ اۊستان، خۊرخۊسي کلسیا جه ايلام، خۊرتاوي کلسيا ؤ خۊرتاو ٚ جه چارمحال ؤ بختياري اۊستان، خۊرتاوي نسا جه کۊهگيلۊیه ؤ بؤیرأحمد ٚ اۊستان، نسا جه بۊشهر ٚ اۊستان ؤ فارس ٚ خليج، ؤ خۊرخۊس ٚ جه عراق ٚ کيشۊر ٚ أمرأ سامانسر دأره. خۊزستان ٚ اۊستان هأسأ ۱۸ نماینده ايسلامي شؤرا مجلس ٚ مئن ؤ ۶ نماینده رابري خبرگان مجلس ٚ مئن دأره.
خوزستان اوستان