باقالا خۊرۊش
باقالا خۊرۊش ايته گيلکي ؤ گيلاني غذا ايسه کي پۊر معرۊفه ؤ غیرگيلاني‌ئن ٚ مئن ني طرفدار دأره ؤ ويشتر ٚ ايران ٚ مردۊم اۊن-أ شناسده. محاله اسمي گيلان ٚ غذایان ٚ جه بایه ولي اۊن ٚ مئن باقالا خۊرۊش دينه بي.
ألبت هأسأ أ خۊرۊش-أ چن‌ته مۊختلف روش مئن طبخ کۊنئده ؤ چن نؤع دأره ولي قديمان ٚ جه أ خۊرۊش-أ پاچ ٚ باقالا أمرأ چأگۊديدي کي هسأ ني هأتؤیه. پاچ ٚ باقالا پۊر لۊبيا سبز-أ مأنه. پاچ ٚ باقالا ويشتر گيلان ٚ دۊرۊن ؤ دۊته وهار ؤ پئيز ٚ فصلان ٚ مئن به‌عمل آیه.
پاچ ٚ باقالا دۊته پۊس دأره یعني اگه خۊدتان زيمي سر بيهينيد یا بازار ٚ جه فگيريد دۊ پۊسه ايسه ؤ وا اۊن ٚ هر دۊته پۊس-أ وچينيد ألبت خواربارفۊرۊشان ٚ ورجه اگه فگيته ببه اۊشان اۊن أولي پۊس-أ گيرده چؤن پۊر جاگیره. معمۊلا دۊکان‌داران ؤ کاسبان یا حتی محلي‌ئن خۊشان ٚ پاچ ٚ باقالا أولي پۊس-أ گيرده بأزين خؤب خۊشک کۊنئده ؤ نهئده باخي فصلان ٚ ره تا اۊن ٚ جه ايستفاده بۊکۊند. ألبت هأسأ أ کار دئه کمتر رائجه ؤ مردۊم پاچ ٚ باقالا هر دۊته پۊس-أ کنئده ؤ دۊکۊنئده فريزر پلاستيک ٚ مئن ؤ نهئده یخچال یا فریزر خؤره بمانه.
باقالا خۊرۊش ٚ چأگۊدن
دچينواچينأول وا پاچ ٚ باقالا هر دۊته پۊس-أ کندن ؤ شۊستن. بأزين ايته یا دۊته بيارسته سير اۊن ٚ مئن دۊگۊده به. ايبچه کي زمات دوارسته زرچۊ ؤ آو اۊن ٚ مئن دۊکۊنيم ؤ سر آخر ايته مۊرغانه اۊن ٚ سر دشکنيم ؤ شيويد ؤ نمک ؤ گرمالت-أ اضافه کۊنيم. باقالا خۊرۊش ٚ قديمي ؤ محلي طبخ، گمج ؤ محلي کره أمرأ ايسه. ألبت هأسأ تيان ؤ رؤغن أمرأ ني اۊن-أ چأکۊنئده ولي گمج ٚ دۊرۊن بئتر به‌عمل آیه. باقالا خۊرۊش معمۊلا کته پلا أمرأ خۊرده به ؤ زیتۊن پرورده ؤ أشپل ماهي ني جه أ خۊرۊش ٚ زرخينه‌ئن ايسده.