پيله کۊرؤش
پيله کۊرؤش هخامنشي نخستين ايران ٚ سلسله-أ بنا گۊده. کۊرؤش ايتا جه کؤنه ايران ٚ پيله پادشاهان بۊ كي هخامنشيان ٚ فرمانروايي-أ بينأ بۊگۊده کي جه آرال ٚ درياچه تا مصر بۊ. هئرؤدؤت يوناني تاريخنگار بينيويشته كۊرؤش، كمبؤجيه پسر كوچي شاه پارس ؤ اونه مأر ماندانا، آستياگ ٚ دختر بؤ.
كۊرؤش بِتَنِسته آستياگ-أ جنگ ٚ مئن شكست بده ؤ اۊن تاج ؤ تخت بدست باوَره. هئرؤدؤت اضافا كۊنه كي كرزؤس، ليدي پادشاه کي آستياگ اۊن زامات بؤستي وختي كۊرؤش ٚ پيروزي آگاه بؤبؤسته، تصميم گيره به كۊرؤش ٚ فرمانروايي فۊتۊرک زنه ولي كۊرؤش اون-أ شكست بدا ؤ شهر سارد، ليدي پايتخت أ محاصره ؤ سرانجام به فتح كۊنه. كۊرؤش، كرزوس أمرأ به نرمي رفتار کۊنه ؤ اۊنه از خؤ نزديكان بۊگۊد. ؤ ايتا جه خؤ سرداران اؤسي بۊگۊد به يۊنانشهران. كۊرؤش با اضافه كۊدن ليدي به خؤ امپراتوري خؤ چومانَ أ بابيل ٚ سرزمين دۊزانه كي اؤضاع آشفته ؤ نابساماني داشتي ؤ خيلي جه بابِليان جه خۊشانه پادشاه كي نبونيد نام داشتي دِله خؤشي نَشتيد. کۊرؤش سال 537 پ.م به بابيل فوتورک زنه ؤ ايپچه كله گيفتن أمرأ بابيل-أ فتح كۊنه. بابيل دۊرۊن هم كۊرؤش خؤجير كاران زياد بۊکۊد؛ يهوديان-أ زندان ٚ مئن آزاد-أ گۊده، بابيليان ٚ دين-أ ايحترام بنه، خدايان جاجيگاه چاگۊد، وختي نبونيد بمرد اۊن ٚ مراسم شركت ؤ عزاي عمۊمي اعلام بۊگۊد ؤ خؤ اعلاميه حقؤق بشر-أ ايتا اؤستوانه رۊ بنيويشته کي کۊرؤش ٚ منشور دۊخانن.
بعد جه بابيل ٚ فتح، كۊرؤش خؤ سپاه أمرأ به خۊرتاو ايران شه تا بياباني قبايل أ كي ماساگت نام داشتيد سركۊب بۊكۊنه. ماساگتان جه سکایي اقوام ایسن کي گذشته دئن میانه آسيا زندگي کۊدن. سال ۵۲۹ پ.م گيرؤدار كله گيفتن دؤ سپاه، كۊرؤش ايتا پيشدار أمرأ زخمي به ؤ ميره ؤ اۊن ٚ پيكر-أ پاسارگاد مئن دفن بۊکۊديد. كۊرؤش دؤ تا پسر داشتي پيله پسر كمبوجيه ؤ كوچي پسر برديا، كمبوجيه جانشين خؤ پئر، كۊرؤش به. كۊرؤش سه تا امپراتوري ماد، ليدي ؤ بابيل فۊگۊردانه. ولي تاريخنگاران اۊن-أ بخشنده ؤ خوجير ٚ شاه شناسيد. پارسان كۊرؤش-أ خۊشان ٚ پئر ؤ يهوديان ٚ منجي دۊخانن. چؤن اؤشان أ جه آشۊريان ٚ شاه کي بختؤالنصر نام دأشته رهانید.
